Krefjast Norðfjarðarganga án tafar

Íbúar Fjarðabyggðar hafa hert baráttu sína fyrir Norðfjarðargöngum og í dag og næstu daga verður gengið í hvert hús í þessu stærsta sveitarfélagi Austurlands til að safna áskorunum til Alþingis og ríkisstjórnar um að hefja framkvæmdir nú þegar.

Aka þarf um 630 metra háan fjallveg til að komast milli Eskifjarðar og Norðfjarðar, þrátt fyrir gömlu Oddsskarðsgöngin, sem grafin voru fyrir hartnær fjörutíu árum í gegnum efsta haftið. Ný sjö kílómetra jarðgöng hafa lengi verið í bígerð en núverandi ríkisstjórn hefur frestað verkefninu.

Jens Garðar Helgason, formaður bæjarráðs Fjarðabyggðar, segir menn hafa beðið mjög lengi eftir þessum göngum. Fyrst hafi þau átt að vera tilbúin 2006, svo 2009 og síðan 2011 en nú sé talað um að fara í framkvæmdir á árunum 2015 til 2018.

„Við bara sættum okkur ekki við það," segir Jens Garðar um þessa frestun framkvæmda.

Slys í febrúar þegar starfsmannarúta Fjarðaáls fór þrjár veltur í brattlenti í Oddsskarði virðist hafa fyllt mælinn, en forstjóri Fjarðaáls, Janne Sigurðsson, segir það hafa verið mjög alvarlegt. Það sé engan veginn hægt að bíða til ársins 2018 og menn verði að fara strax í verkefnið.

Bæjarstjóri Fjarðabyggðar ásamt bæjarfulltrúum fara fremst í flokki þeirra sem ganga á milli húsa til að safna áskorunum til stjórnvalda. Þeir telja íbúa Fjarðabyggðar leggja sitt af mörkum inn í þjóðarbúið til að eiga inni fyrir göngunum. Jens Garðar minnir á að 4.700 manns búi í Fjarðabyggð og að 25-30% af vöruútflutningi þjóðarinnar fari um hafnir sveitarfélagsins.