Þrjátíu manna teymi framkvæmdi húsleitir í Lúxemborg vegna Landsbankans

Þrjátíu manna teymi á vegum sérstaks saksóknara og rannsóknarlögreglunnar í Lúxemborg framkvæmdi í dag húsleitir á þremur stöðum í Lúxemborg vegna rannsóknar meintri markaðsmisnotkun gamla Landsbankans fyrir hrunið.

Það var í gær sem sex manna teymi frá sérstökum saksóknara, Ólafur Þór Hauksson og fimm aðrir sérfræðingar hjá embættinu, héldu til Lúxemborgar vegna málsins. Það var svo í dag sem ráðist var í húsleitirnar á þremur stöðum.

Leitað var á skrifstofum Landsbankans í Lúxemborg, sem er nú í slitameðferð. Þá var leitað á skrifstofum tveggja fyrirtækja í Lúxemborg vegna grunsemda um að þar hafi verið geymd gögn sem hafa þýðingu fyrir rannsóknina, að sögn Ólafs Þórs Haukssonar, sérstaks saksóknara. Það voru 24 sérfræðingar frá rannsóknarlögreglunni í Lúxemborg ásamt Íslendingunum sex sem tóku þátt í húsleitinni.

Húsleitirnar í Lúxemborg í dag tengjast meðal annars fjórum aðgreindum málum sem ráðist var í húsleitir vegna á Íslandi hinn 14. janúar 2011.

Í fyrsta lagi máls vegna meintrar markaðsmisnotkunar Landsbankans með hlutabréf útgefin af bankanum sjálfum.

Í öðru lagi lánveitingar félaganna Hunslow S.A, Bruce Assets Limited, Pro-Invest Partners Corporation og Sigurðar Bollasonar ehf. til að kaupa á hlutabréfum í Landsbankanum.

Hunslow er í eigu Stefáns Ingimars Bjarnasonar og fékk 1,6 milljarða króna lán til að fjármagna hlutabréfakaup í Landsbankanum. Bruce Assets var í eigu bræðranna Ólafs Steins og Kristjáns S. Guðmundssona og fékk lán í sama tilgangi. Sigurður Bollason ehf. í var eigu athafnamannsins Sigurðar Bollasonar og fékk 3,5 milljarða króna lánaða til að kaupa bréf í Landsbankanum.

130 milljarðar fóru til Lúxemborgar til að kaupa lánasafn

Félagið Pro-Invest var í eigu Georg Tzvetanski, en um er að ræða búlgarskan viðskiptafélaga Björgólfs Thors Björgólfssonar sem fékk 4,5 milljarða króna yfirdráttarlán hjá Landsbankanum í Lúxemborg í lok september 2008, aðeins viku fyrir hrun.

Í þriðja lagi er um ræða kaup Landsbankans á lánasafni Landsbankans í Lúxemborg og síðasta af þessum fjórum tengist kaupum á hlutabréfum í bankanum af hálfu félaga sem héldu um kauprétti starfsmanna Landsbankans og lánveitingar bankans til þessara sömu félaga.

Heildarupphæðin, sem Landsbanki Íslands reiddi fram til þess að kaupa lánasafnið af Landsbankanum í Lúxemborg, sem er til rannsóknar hjá sérstökum saksóknara, nam um 784 milljónum evra, að því er fram kemur í skýrslu rannsóknarnefndar Alþingis. Þetta er jafnvirði um 130 milljarða króna. Fram kemur í skýrslu RNA að um 11 aðgreinda aðila hafi verið að ræða í umræddu lánasafni og að stærsti lántakandinn sem færslan hafi náð til hafi verið Björgólfur Thor Björgólfsson, aðaleigandi Landsbankans, með um 225 milljónir evra. Björgófur Thor hefur á vefsíðu sinni gert athugasemdir við framsetningu á þessu í skýrslu rannsóknarnefndarinnar.

Góður gangur í rannsóknum

Að sögn Ólafs Þórs Haukssonar, sérstaks saksóknara, er góður gangur í rannsóknum á þessum málum sem voru grundvöllur aðgerðanna í Lúxemborg í dag. Enginn var handtekinn í tengslum við húsleitirnar í dag og ekki voru framkvæmdar húsleitir hér heima á Íslandi að þessu sinni. thorbjorn@stod2.is