Landsvirkjun lokkar gagnaver með lágu orkuverði

Landsvirkjun er með metnaðarfull áform um að ná til sín hluta af raforkumarkaðinum fyrir gagnaver í Evrópu. Lágt orkuverð á að stuðla að því.

Landsvirkjun hyggst ná 1% af raforkumarkaðinum í Evrópu fyrir gagnaver fyrir árið 2020. Fjallað er um málið á MarketWatch einni af vefsíðum blaðsins Wall Street Journal. Þar kemur fram að orkan sem Landsvirkjun þarf að framleiða til að ná þessu marki nemi 1,5 tetrawattstund eða um 10% af núverandi orkuframleiðslu fyrirtækisins. Jafnframt kemur fram að Landsvirkjun hyggst bjóða ódýrasta orkuverðið í Evrópu til að ná þessu marki.

Á vefsíðunni er sagt að verðið verði 43 dollara á megawattstundina miðað við orkusamninga til 12 ára. Til samanburðar er orkuverðið í skammtímasamningum í Evrópu að jafnaði 65 dollarar eða 50% hærra en það verð sem Landsvirkjun býður og fer hækkandi.

Fram kemur á vefsíðunni að Ísland henti vel til reksturs gagnavera og að þar að auki sé um sjálfbæra orkuframleiðslu að ræða sem æ fleiri orkunotendur vilji fá að kaupa.