Atvinnuþátttaka var tæplega 80% í mars

Samkvæmt vinnumarkaðsrannsókn Hagstofu Íslands voru í mars s.l. að jafnaði 177.400 manns á vinnumarkaði. Af þeim voru 164.100 starfandi og 13.300 án vinnu og í atvinnuleit. Atvinnuþátttaka mældist 79,4%, hlutfall starfandi 73,4% og atvinnuleysi var 7,5%.

Atvinnuleysi stendur nánast í stað frá mars í fyrra en þá mældust atvinnulausir 13.400 eða 7,6% vinnuaflsins. Lítil breyting var einnig á fjölda starfandi fólks frá því í mars í fyrra en hlutfall starfandi lækkaði um 0,1 prósentustig úr 73,6%.

Meðalfjöldi vinnustunda var 40,2 klst. hjá þeim sem voru við vinnu í viðmiðunarvikunni en voru 39,4 klst. í mars í fyrra.