Hraunar yfir tillögu meirihlutans: 4 Smáralindir við Landspítalann?

Gísli Marteinn Baldursson, borgarfulltrúi Sjálfstæðisflokksins, gagnrýnir harðlega nýtt deiliskipulag Landspítalans við Hringbraut sem meirihlutinn í borginni hefur lagt fram. Hann segir tillöguna mjög vonda; bílastæðamál séu mjög illa leyst og ásýndin að gamla spítalanum hverfi á bak við risabyggingar.

Í pistli á heimasíðu sinni segir Gísli að ef deiliskipulagið verði samþykkt verði þar byggingar sem séu um 290 þúsund fermetrar að stærð - það sé eins og fjórar Smáralindir. Í pistlinum segir hann að tillagan sé ónæm fyrir umhverfi sínu og gangi gegn markmiðum borgarinnar bæði í samgöngu- og skipulagsmálum. Hún sé einfaldlega óásættanleg.

„Furðulegast í þessu öllu er þó byggingarmagnið sjálft. Samkvæmt þessu skipulagi ætla Íslendingar að fara að reisa spítala sem verður samtals um 290 þúsund fermetrar. Núverandi Landspítali er 60-70 þúsund fermetrar og Borgarspítalinn 30 þúsund fermetrar (samtals 90-100 þúsund fermetrar). Ástæða nýju byggingarinnar er sameining þessara tveggja spítala, og í því ljósi er mjög sérstakt að sameinaður muni spítalinn verða þrisvar sinnum stærri en þeir tveir hlutar sem eru að sameinast," skrifar Gísli Marteinn.

„Sænska Arkitektastofan White lagði til meira byggingamagn en Ementor, og sagði að 135 þúsund fermetrar væri hæfilegt heildarbyggingamagn. Lengst gekk þó norska arkitektastofan Momentum sem taldi að 130 þúsund fermetrar gætu dugað okkur, en 180 þúsund fermetrar væri líka möguleiki ef Íslendingar væru verulega stórhuga. Niðurstaða Íslendinganna: 290 þúsund fermetrar.

Til samanburðar má geta þess að Nýi spítalinn í Þrándheimi er um 200 þúsund fermetrar, en hann þjónar um 650 þúsund manns, eða öllum norður og suður Þrændarlögum. Nýja Akerhus háskólasjúkrahúsið er 136 þúsund fermetrar og þjónar fleirum en Landspítalinn. Nýja Austfoldar sjúkrahúsið í Noregi er 112 þúsund fermetrar."

Hægt er að lesa pistil Gísla Marteins hér.