Yfir 1,5 milljarðar liggja inni á dauðum bankareikningum

Rétt rúmlega 100 þúsund innlánsreikningar hafa staðið óhreyfðir í 15 ár eða lengur í bankakerfinu. Á þessum reikningum eru samtals rúmlega 1,5 milljarðar kr. eða um 15.000 kr. á hverjum þeirra að meðaltali.

Þetta kemur fram í svari efnahags- og viðskiptaráðherra við fyrirspurn Eyglóar Harðardóttur þingmanns Framsóknarflokksins á Alþingi.

Eygló spurði einnig um hvað reglur gilda um innlánsreikninga sem eru óhreyfðir í 15 ár eða lengur.

Í svarinu segir að samkvæmt lögum um fyrningu kröfuréttinda, fyrnast kröfur vegna innlána eða verðmæta sem lögð hafa verið inn hjá fjármálafyrirtæki, opinberum sjóði eða öðrum aðila, sem hefur heimild að lögum til að taka við innlánum frá almenningi, auk vaxta af slíkum kröfum, á 20 árum frá þeim degi er verðmætin voru lögð inn.

Nýr fyrningarfrestur byrjar að líða þegar kröfuhafi hefur fengið umráð fjármunanna með því að taka þá út eða setja fjármuni inn á reikninginn. Fyrningu er hins vegar ekki slitið við það eitt að áfallnir vextir séu lagðir við innstæðuna. Slíkar kröfur fyrnast þó því aðeins að viðtakandi fjármunanna veki athygli kröfuhafa eða erfingja hans, tímanlega og á sannanlegan hátt, á að krafan sé að fyrnast.