Fermingar hafa mikil áhrif á hagkerfið

Fermingar hafa umtalsverð áhrif á hagkerfið á þessum tíma ársins, en yfir fjögur þúsund Íslendingar eru nú á fermingaraldri. Fréttastofa komst í raun um að fermingarveislur hafa í för með sér milljarðaveltu í hagkerfinu og skipta umtalsverðu máli fyrir kaupmenn.

Fermingin er stór stund fyrir unglinga á fjórtánda aldursári. Fermingarveisluhaldið, sem þessum tímamótum fylgja, hefur umtalsverð veltuáhrif á hagkerfið. Veislan og gjafirnar kosta jú sitt.

Fermingarveislur eru misjafnlega miklar að umfangi, eins og gengur, en þær hafa töluverð áhrif á veltu á ýmsum vörum sem tengjast veislunum, svo sem mat- og gjafavörum. Þannig tvöfaldast iðulega sala á rjóma-, ýmsum ostategundum og ostakökum, hjá Mjólkursamsölunni í kringum fermingar.

En hver er veltan í fermingarhagkerfinu? Í veislu með hundrað gestum kostar veisluhald 300 þúsund. Virði gjafa gesta til fermingarbarnsins er um 500 þúsund, með reiðufé og öllu. Miðað við að 90 prósent þeirra 4.178 einstaklinga sem eru nú á fermingaraldri fermist, þá er veltan um þrír milljarðar, miðað við að fyrrnefnt dæmi sé meðaltal fyrir hverja veislu.

Í minni og ódýrari veislu, með fimmtíu gesti, kostar veisluhaldið 100 þúsund og virði gjafa er 250 þúsund. Heildarveltan í fermingarhagkerfinu yrði miðað við þetta um 1,7 milljarðar króna.

Þetta sýnir kannski það helst, að fermingin snýst ekkert síður um beinharða peninga fyrir kaupmenn, en trúrækni unglinga.