Karl biskup flutti sína síðustu páskapredikun í dag

Karl Sigurbjörnsson, biskup, flutti sína síðustu páskahátíðarpredikun í Dómkirkjunni í morgun en hann lætur af embætti í sumar. Hann segir það hafa verið gleðilegt að fá að flytja þjóðinni boðskapinn í gegnum árin.

Herra Karl Sigurbjörnsson, biskup Íslands, flutti hátíðarpredikun sína í morgun og gerði upprisuna að umtalsefni sínu. Hann sagði kristindóminn grundvallast á henni. Hún væri raunveruleiki í heiminum. Kristin trú sé ekki skoðanir eða álit á hinu og þessu sem fangar hug þeirra sem hugsa og skrafa, blogga og blaðra hverju sinni.

Þá talaði Karl um skírnarathöfn á heimili í Reykjavík og spurði hvaða sögu það segði að þrátt fyrir skefjalausan áróður gegn kirkjunni, hinum kristna sið og trúarhefðum, þá lifi flestar fjölskyldur í landinu slíkar helgistundir um ársins hring. Flest ung börn væru enn borinn til skírnar og nú í vor hafi mikill meirihluti unglinga á 14. aldurási fermst, þrátt fyrir andróðurinnn og svívirðingarnar sem þau þurfi nú einatt að þola frá umhverfinu, eins og biskup orðaði það.

Hann sagði því trúna og hinn kristna sið virðast vera ómissandi þátt í lífi þorra fjölskyldna í landinu. Gömlu góðu siðferðisgildin væru ekki horfin út vitund þjóðarinnar og því fari fjarri að hér hafi orðið siðrof.

Karl sagði kirkjuna vera ein grunnstoða hins góða mannúðar-samfélags. Stór hluti þjóðarinnar haldi enn tryggð við hinn kristna sið, þrátt fyrir allt, og vilji sjá kirkjuna og hið kristna uppeldi í trú og sið lifa og dafna með þjóðinni.

Hægt er að sjá ítarlegt viðtal við Karl hér.