Ríkið gæti þurft að greiða Ólafi hálfan milljarð

Ríkið gæti þurft að greiða félagi í eigu Ólafs Ólafssonar tæpan hálfan milljarð til baka vegna olíusamráðsmálsins. Félagið ætlar að nota peningana í lífeyrisgreiðslur fyrrverandi starfsmanna, ef afgangur verður fer hann til góðgerðarmála.

Héraðsdómur Reykjavíkur felldi í vikunni úr gildi ákvörðun áfrýjunarnefndar samkeppnismála um sektargreiðslur vegna olíusamráðsins árin 1993 til 2001. Íslenska ríkið þarf því að greiða Ker, áður Olíufélaginu Esso, 495 milljónir, Skeljungi 450 milljónir og Olís 560 milljónir. Samtals um einn og hálfan milljarð króna.

Tekin hefur verið ákvörðun um að vísa málinu til Hæstaréttar og verða peningarnir ekki endurgreiddir fyrr en niðurstaða liggur þar fyrir.

Félögin greiddu sektina í ársbyrjun 2005, eftir úrskurð áfrýjunarnefndar samkeppnismála, með fyrirvara um lögmæti hennar en tekist hefur verið á um málið fyrir dómstólum allar götur síðan.

Eignarhald á Olís hefur lítið breyst síðan þá. Þrátt fyrir að eignarhald á Skeljungi hafi tekið breytingum á þessum árum þá er staðan sú að félagið á sjálft kröfuna og fær hana endurgreidda ef Hæstiréttur staðfestir dóminn.

Þessu eru öðruvísi háttað með olíufélagið ESSO það var selt eftir að málið kom upp og heitir í dag N1. N1 fær hins vegar ekki hálfrar milljarðar króna sektargreiðsluna ef af verður heldur Ker sem átti ESSO á sínum tíma. Ker er í eigu fjárfestingarfélagsins Kjalar sem aftur er í eigu Ólafs Ólafssonar sem kenndur hefur verið við Samskip.

Ljóst var fyrr í mánuðinum að Ólafur heldur Kjalar eftir að hann gekk frá samningi við Arion banka um skuldir sínar og bankinn tók til sín stóran hlut í HB Granda.

Heimir Sigurðsson eini stjórnarmaður Kers segir að peningarnir verði notaðir til að greiða skuldbindingar félagssins sem felast að mestu leyti í lífeyrissgreiðslum til fyrrverandi starfsmanna Olíufélagsins. Stjórn og eigndur Kers hafa síðan ákveðið að allar endurgreiðslur umfram þessar skuldbindingar verða gefnar til góðgerðarmála.