Niðurstaðan hljóti að vera vonbrigði

Niðurstaðan úr gjaldeyrisútboðum Seðlabanka Íslands sem haldin voru í gær hlýtur að hafa valdið bankanum töluverðum vonbrigðum, segir Greining Íslandsbanka í Morgunkorni sínu í dag. Greining segist telja að niðurstaðan viti ekki á gott fyrir framhald áætlunar stjórnvalda um afléttingu hafta næsta kastið. Þó gefur niðurstaðan vissulega vísbendingar um það gengi sem innlendir og erlendir fjárfestar eru tilbúnir að eiga viðskipti á með krónur fyrir evrur. Sem kunnugt er þá ræðir hér um þrjú útboð. Í tveimur útboðum sem fóru fram um morguninn keypti bankinn evrur, annars vegar gegn greiðslu í verðtryggðu ríkisbréfunum RIKS33 og hins vegar í skiptum fyrir krónur til langtímafjárfestingar samkvæmt hinni svokölluðu 50/50 leið, en í hinu þriðja sem fór fram eftir hádegi kallaði bankinn eftir tilboðum frá aðilum sem vildu kaupa evrur og greiða krónur fyrir.

Greining segir að þátttakan í morgunútboðunum hafi verið mun minni en í gjaldeyrisútboðunum í febrúar. Þannig hafi heildarfjárhæð tilboða hljóðað upp á 92,9 milljónir evra í gær samanborið við 173,6 milljónir evra í febrúarútboðunum. Þetta sé jafnframt lægri fjárhæð en bankinn hafði stefnt að kaupa í þessum tveimur útboðum sem var 100 milljónir evra, en bankinn áskildi sér eðlilega rétt til þess að breyta þeirri fjárhæð eftir þörfum. Alls tók bankinn tilboðum að fjárhæð 22,5 milljónir evra í útboðunum, á 239 krónur fyrir hverja evru.

Þá segir Greining að þátttakan í 50/50 hafi verið aðeins þriðjungur af þátttöku í febrúar. Í 50/50 leiðina hafi borist alls 23 tilboð að fjárhæð 22 milljónir evra og bankinn tekið tilboðum fyrir 20,7 milljónir evra, sem samsvarar til um 4,9 milljarða króna. Þetta sé mun minni þátttaka en í febrúar, en þá hafi fjárhæð tilboða numið 59,1 milljónum evra, og hafi þeim jafnframt öllum verið tekið. Því megi ætla að fátt hafi verið um krónukaup tengt stórum fjárfestingum til langs tíma í íslensku atvinnulífi, og frekar að um hálfgerðan samtíning hafi verið að ræða.