Enn er fjör á fasteignamarkaðinum

Fjöldi þinglýstra kaupsamninga á höfuðborgarsvæðinu í síðustu viku var 98. Þetta eru nokkuð fleiri samningar en nemur meðaltali þeirra á viku síðustu 12 vikurnar sem er 85 samningar.

Þetta kemur fram á vefsíðu Þjóðskrár Íslands. Þar segir að af þessum 98 samningum var 71 samningur um eignir í fjölbýli, 20 samningar um sérbýli og 7 samningar um annars konar eignir en íbúðarhúsnæði.

Heildarveltan var 2.806 milljónir króna og meðalupphæð á samning 28,6 milljónir króna. Til samanburðar var heildarveltan að meðaltali um 2,6 milljarðar á viku síðustu 12 vikurnar og meðalupphæð á viku 30,5 milljónir kr. á sama tímabili.

Í síðustu viku var 9 kaupsamningum þinglýst á Suðurnesjum. Þar af voru 3 samningar um eignir í fjölbýli, 3 samningar um sérbýli og 3 samningar um annars konar eignir en íbúðarhúsnæði. Heildarveltan var 165 milljónir króna og meðalupphæð á samning 18,3 milljónir króna.

Á sama tíma var 14 kaupsamningum þinglýst á Akureyri. Þar af voru 5 samningar um eignir í fjölbýli, 8 samningar um sérbýli og 1 samningur um annars konar eignir en íbúðarhúsnæði. Heildarveltan var 339 milljónir króna og meðalupphæð á samning 24,2 milljónir króna.

Á sama tíma var 2 kaupsamningum þinglýst á Árborgarsvæðinu. Þar af var 1 samningur um eignir í fjölbýli og 1 samningur um sérbýli. Heildarveltan var 42 milljónir króna og meðalupphæð á samning 20,9 milljónir króna.