"Þetta er framtíð tölvunotkunar"

Nýjasta stýrikerfi Microsoft, Windows 8, var opinberað í gær. Fyrstu viðbrögð frá sérfræðingum og neytendum eru afar jákvæð.

„Þetta er framtíð tölvunotkunar," sagði sérfræðingur tæknifréttasíðunnar Wired.

Windows 8 markar tímamót í hugbúnaðarþróun Microsoft. Fyrirtækið hefur endurskoðað notendaviðmót Windows stýrikerfisins frá grunni og er áhersla lögð á samþættingu heimilistölvunnar, spjaldtölvunnar og snjallsímans.

Viðmót Windows 8 byggir á hinum svokölluðu „skífum" sem koma í stað hinna hefðbundnu tákna sem notuð voru til að opna forrit og skjöl. Skífurnar uppfærast í rauntíma og birta upplýsingar á skjámyndinni.

Með Windows 8 vonast Microsoft til að auka hlutdeild sína á spjaldtölvu markaðinum en Apple hefur stjórnað markaðinum frá því að iPad spjaldtölvan var opinberuð árið 2010.

Þó svo að 90% af tölvum veraldar noti Windows stýrikerfið þá hefur Microsoft dregist aftur úr í nýsköpun. Microsoft hefur þó tekist að skila hagnaði síðustu ár og er það aðallega að þakka yngri deildum fyrirtækisins líkt og Xbox.

„Apple hefur tekist að skilgreina spjaldtölvu markaðinn," sagði Michael Cherry, fyrrverandi verkfræðingur hjá Microsoft. „Ef Microsoft ætlar sér að hertaka markaðinn þá verður Windows 8 að slá í gegn. Þeir hafa ekki efni á að valda viðskiptavinum sínum vonbrigðum."

Hægt er að sjá kynningarmynd sem Microsoft lét vinna fyrir Windows 8 hér fyrir ofan. Áhugasamir geta einnig nálgast stýrikerfið hér.