Sér um upplýsingakerfi Landsbjargar

Slysavarnarfélagið Landsbjörg hefur valið alrekstrarþjónustu Nýherja en hún felur í sér rekstur á upplýsingakerfum, notendabúnaði og miðlægum búnaði félagsins. Í tilkynningu frá Nýherja segir að kannanir og reynsla sýni að fyrirtæki geti sparað sér tugi prósenta með því að vera í alrekstrarþjónustu í stað þess að sjá sjálf um rekstur sinna tölvukerfa.

„Með altækum samningi fá viðskiptavinir einnig aðgang að sérfræðingum Nýherja með áralanga reynslu og sérþekkingu. Þeir eru alltaf til taks og veita persónulega þjónustu. Um leið geta notendur gengið út frá því sem vísu að UT kerfi þeirra séu í öruggum rekstri," segir Emil Einarsson framkvæmdastjóri Fyrirtækjasviðs Nýherja en fyrirtækið er einn af styrktaraðilum Slysarvarnafélagsins Landsbjargar.