Segir enn ekkert réttlæta uppsögn

Gunnar Andersen, forstjóri Fjármálaeftirlitsins, og Skúli Bjarnason, lögmaður hans, eru nú að fara yfir bréf sem þeim barst frá stjórn Fjármálaeftirlitsins í gær. Í bréfinu er Gunnari veittur viðbótarfrestur til þriðjudags til að gera athugasemdir við fyrirætlaða uppsögn hans. Eins og kunnugt er byggir fyrirætluð uppsögn á áliti sem Ástráður Haraldsson og Ásbjörn Björnsson skrifuðu fyrir stjórn Fjármálaeftirlitsins.

Gunnar krafðist upplýsinga á því hvaða nýjar upplýsingar kæmu fram í álitinu sem réttlætti uppsögnina, en bent hefur verið á að sem starfsmaður Landsbankans árið 2001 hefði Gunnar ekki svarað bréfi frá Fjármálaeftirlitinu á fullnægjandi hátt og svarið beinlínis verið villandi. Á þetta atriði benti Andri Árnason hæstaréttarlögmaður í fyrri lögfræðiálitum sem hann vann fyrir stjórn Fjármálaeftirlitsins á hæfi Gunnars og þeir Ástráður og Ásbjörn bentu líka á það. Þetta þótti aftur á móti ekki valda vanhæfi Gunnars til að gegna starfi forstjóra en í áliti Ástráðs og Ásbjörns segir að rýrð sé kastað á hæfi hans.

„Það eru mikið fleiri orð í þessu bréfi en við höfum fengið fram að þessu. Þetta er þá allavega upp á fimm siður," segir Skúli Bjarnason í samtali við Vísi um bréfið sem barst frá stjórn Fjármálaeftirlitsins í gær. Hann segir að enn sé verið að fara yfir bréfið en segist ekki sjá neitt nýtt í því sem réttlæti uppsögn. „Ég hef ekki getað greint neinn nýjan sannleik í þessu bréfi og allavega ekki ný gögn," segir Skúli. „Það er orðið margstaðfest, þrátt fyrir fullyrðingar um hið gagnstæða, að það er ekki um nein ný gögn að ræða að því er varðar þetta ágæta bréf frá 2001, sem er orðið svona blásið upp og út úr öllu samhengi