Á öndverðum meiði um næstu vaxtáákvörðun

Sú athyglisverða staða er komin upp viku fyrir næstu stýrivaxtaákvörðun Seðlabankans að fjárfestar og sérfræðingar eru á öndverðum meiði um hvort vextirnir verði hækkaðir eða ekki.

Greiningar bankanna hafa sett fram spár um ákvörðun Seðlabankans og eru þær samhljóma um að stýrivöxtunum verði haldið óbreyttum í þessum mánuði. Þrátt fyrir að verðbólgan sé umfram endurskoðaða spá Seðlabankans fyrir fyrsta ársfjórðung þessa árs, og að gengi krónunnar haldi áfram að falla, munu vextirnir ekki verða hækkaðir að mati sérfræðinganna.

Helstu rök þeirra eru m.a. að verðbólguskotið var vitað fyrirfram og það muni ganga yfir og að fallandi gengi krónunnar sé árstíðabundin sveifla.

Fjárfestar eru á öðru máli ef marka má þróun á verði óverðtryggðra skuldabréfa ríkisins til lengri tíma. Þau hafa fallið í verði um 5% til rúmlega 6% á undanförnum dögum.

Fjallað er um málið í fréttabréfi fjármálafyrirtækisins Júpiters og þar segir að þetta bendi til að margir eða vel flestir fjárfestar búist við vaxtahækkun hjá Seðlabankanum.

Seðlabankinn kynnir ákvörðun sína þann 8. febrúar n.k.