Vöruskiptin voru neikvæð í desember

Vegna villu í grunngögnum í desember þarf að leiðrétta bráðabirgðatölur um vöruskiptin við útlönd í fyrra . Útflutningur í desember 2011 lækkar því um 7,6 milljarða kr. í heild sem þýðir að vöruskiptin voru neikvæð um 0,6 milljarða kr. í þeim mánuði.

Þetta kemur fram á vefsíðu Hagstofunnar. Þar segir að samkvæmt leiðréttum bráðabirgðatölum voru fyrir allt árið 2011 fluttar út vörur fyrir 618,8 milljarða króna en inn fyrir 521,9 milljarð króna. Afgangur var á vöruskiptunum við útlönd sem nam 96,9 milljörðum en árið áður voru þau hagstæð um 119,9 milljarða á sama gengi. Vöruskiptajöfnuðurinn var því 23 milljörðum króna óhagstæðari en árið áður.

Samkvæmt bráðabirgðatölum voru í desembermánuði fluttar út vörur fyrir 52,8 milljarða króna og inn fyrir 53,4 milljarða króna. Vöruskiptin í desember voru því óhagstæð um 0,6 milljarða króna. Í desember 2010 voru vöruskiptin hagstæð um 14,6 milljarða króna á sama gengi.

Endanlegar niðurstöður um vöruskiptin fyrir árið 2011 verða gefnar út í apríl 2012.