Icelandair selur SmartLynx í Lettlandi

Fyrir síðustu áramót gekk Icelandair frá samningi við stjórnendur SmartLynx um kaup á öllu hlutafé félagsins. Í samningnum voru nokkrir fyrirvarar sem nú hafa verið uppfylltir.

Síðan fjárhagslegri endurskipulagningu Icelandair Group hf. lauk þá hefur staðið til að selja dótturfélag þess, SmartLynx í Lettlandi.

Í tilkynningu segir að salan sé bókfærð á árinu 2011 og hefur jákvæð áhrif á afkomu Icelandair Group að fjárhæð 1,1 milljarð króna, þar af eru tekjuskattsáhrif jákvæð um 700 milljónir króna. Áhrif á eigið fé eru óveruleg.

Eftir söluna er Icelandair Group enn í ábyrgð fyrir leigugreiðslum á tveimur Airbus 320 vélum en ábyrgðin rennur út í apríl 2012. Jafnframt er Icelandair Group í ábyrgð vegna leigu á tveimur Boeing 767 vélum og renna þeir leigusamningar út í lok árs 2012. Allar þessar flugvélar eru reknar á flugrekstrarskírteini SmartLynx.