Enn hækkar gengi bréfa í Icelandair

Gengi bréfa í Icelandair Group í kauphöllinni heldur áfram að hækka en gengið hefur hækkað um 1,83 prósent í dag og er það, þegar þetta er skrifað, 5,55. Í gær hækkaði gengi bréfa félagsins um 2,83 prósent. Hægt er að fylgjast með gangi mál á nýjum markaðsupplýsingavef Vísis.

Væntingar eru um að Icelandair muni birta gott uppgjör fyrir árið 2011, en von er á því í þessari viku.

Eins og greint var frá fyrr á Vísi í gær gerir greiningardeild Arion banka ráð fyrir því að tekjur Icelandair Group á fjórða ársfjórðungi síðasta árs verði 20 milljarðar króna og EBITDA verði um 400 milljónir króna. Ársfjórðungsuppgjör verður birt í þessari viku.

Í Markaðspunktum Arion segir að fyrsti og fjórði ársfjórðungur séu vallt lökustu fjórðungarnir hjá félaginu bæði hvað veltu og afkomu varðar. Miðað við flutningstölur félagsins megi gera ráð fyrir töluverðum tekjuvexti frá fyrra ári. Samkvæmt afkomuspá stjórnenda Icelandair Group frá nóvember síðastliðnum er gert ráð fyrir að EBITDA félagsins á fjórða ársfjórðungi verði lítil sem engin eða neikvæð um allt að 500 milljónir króna.