Hugsmiðjan með tvær bestu vefsíðurnar

Tvær bestu vefsíður síðasta árs að mati fagfólks í greininni komu úr smiðju sama aðila, veffyrirtækisins Hugsmiðjunnar. Þetta kemur fram í tilkynningu.



Vefur Tryggingastofnunar hlaut nýverið verðlaun sem „besti ríkisvefurinn" en vefur stofnunarinnar kom afar vel út úr sérstakri úttekt Deloitte á vefsíðum hins opinbera og var síðan einnig valin af dómnefnd sem sú vefsíða sem sameinaði best þjónustuhlutverk viðkomandi stofnunar, væri aðgengileg öllum og nýtti góðar lausnir í vefhönnun. Alls voru skoðaðar 267 vefsíður ríkisstofnana, ráðuneyta og sveitarfélaga.

Um liðna helgi var svo tilkynnt hverjir hlytu SVEF-verðlaunin svokölluðu, sem eru verðlaun vefiðnaðarins hér á landi. Hugsmiðjan fékk einnig verðlaun fyrir vef Orkusölunnar. Vefurinn fékk þrenn verðlaun þar á meðal sem „vefur ársins". Orkusalan hlaut einnig útnefningu í flokknum „Besti sölu- og kynningarvefurinn með færri en 50 starfsmenn" og í flokknum „Besta útlit og viðmót".

Eðli málsins samkvæmt eru fyrirtækin sem tilheyra íslenska vefiðnaðinum flest ung að árum. Hugsmiðjan var stofnuð árið 2001 og aðeins 11 ára gömul telst hún vera „reynsluboltinn í vefbransanum". Hugsmiðjan er í eigu helstu lykilstarfsmanna og 25 manns vinna hjá fyrirtækinu (þar af 5 konur) á skrifstofum þess á Snorrabraut

Ragnheiður H. Magnúsdóttir, vélaverkfræðingur og framkvæmdastjóri Hugsmiðjunnar segir í tilkynningu enga eina ástæðu fyrir þessari velgengni. „Við eigum náttúrulega orðið mjög reynt fólk á þessu sviði og þegar að gott samstarf tekst með viðskiptavininum og okkar sérfræðingum þá verður afraksturinn eftir því. Í tilfelli Orkusölunnar fengum við t.d. fullt frelsi til að prófa nýja hluti og þar var lögð sérstök áhersla á að hugsa vefinn út frá hugsanlegum notendum vefjarins. Allt var sett í samhengi - hönnun, myndir og texti spila t.d. sérstaklega vel saman og niðurstaðan er glæsilegur vefur sem notandanum langar til að kynna sér nánar. Svo er hann einfaldlega flottur og örlítið óvenjulegur í útliti," segir Ragnheiður í tilkynningunni.