Þrotabú Samson krefst 518 milljóna vegna Árvakursviðskipta

Tekist var á um þá kröfu þrotabús Samson, fjárfestingafélags Björgólfs Guðmundssonar og Björgólfs Thors Björgólfssonar, að rifta kaupum á 16,7 prósenta hlut í Árvakri, útgáfufélagi Morgunblaðsins, á þeim grundvelli að um gjafagjörning hafi verið að ræða, í Héraðsdómi Reykjavíkur í dag.

Málið byggir á því að Samson hafi keypt 16,7 prósenta hlut í eigu félagsins MGM, dótturfélags Straums fjárfestingabanka, á miklu yfirverði. Kaupin fóru fram 25. júní 2008 og greiddi Samson 822 milljónir króna fyrir hlutinn. Fyrir liggur í málinu mat Jóhanns Unnsteinssonar endurskoðanda, um að fyrrnefndur hlutur hafi í besta falli verið 304 milljóna króna virði á þeim tíma þegar kaupin fóru fram. Straumur fjárfestingabanki, sem var að stærstum hluta í eigu Björgólfsfeðga, fjármagnaði kaup Samson með lánum, að því er fram kom fyrir dómi í dag. Þannig fjármagnaði Straumur kaup Samson á bréfunum í Árvakri sem voru í eigu bankans sjálfs.

Þrotabú Samson fer fram á að fá mismuninn á kaupverðinu og matsverðinu greiddan frá Straumi (ALMC), eða 518 milljónir króna. Því hafnar bankinn alfarið og ítrekaði Gísli Guðni Hall hrl., lögmaður Straums, þá kröfu fyrir dómi í dag.

Fyrir dóminn voru kölluð nokkur vitni, þar á meðal fyrrum starfsmenn Straums sem komu að viðskiptunum. Þá var tekin skýrsla af Sigþóri Sigmarssyni, framkvæmdastjóra Novator ehf., og var hann spurður út í fyrrnefnd viðskipti, og þá einkum tölvupósta sem hann sendi starfsmönnum Straums í tengslum við kaupin. Hann sagði kaupin hafa verið fullkomlega eðlileg og verðmatið á bréfunum hefði verið talið rétt á þeim tíma er viðskiptin fóru fram.

Dómur í málinu verður kveðinn upp innan fjögurra vikna lögum samkvæmt.