Íslendingar ekki bjartsýnni síðan fyrir hrun

Nýtt ár leggst greinilega vel í landsmenn, en samkvæmt væntingavísitölu Gallup sem birt var nú í morgun hafa væntingar íslenskra neytenda nú ekki verið hærri frá því fyrir hrun.

Fjallað er um málið í Morgunkorni greiningar Íslandsbanka. Þar segir að væntingavísitalan hækkaði í janúar um 7,5 stig frá fyrri mánuði sem er aukning um 11% og mælist nú 75 stig, en svo há hefur væntingavísitalan ekki verið frá því í september 2008.

Landsmenn fara mun bjartsýnni inn í þetta ár en það síðasta, en vísitalan í janúar sl. er 13,5 stigum hærri nú en í janúar í fyrra. Væntingar neytenda hafa nú glæðst samfellt undanfarna þrjá mánuði sem er í takti við bata í efnahagslífinu almennt, en útlit er fyrir að hagvöxtur á síðasta ári fari jafnvel framúr væntingum spáaðila sem gerðu ráð fyrir að vöxtur síðasta árs yrði á bilinu 2,5 -3,1%.

Einkaneyslan jókst um 4,4% fyrstu 3 ársfjórðunga síðasta árs sé miðað við sama tímabil fyrra árs og kaupmáttur launa hafði í desember sl. hækkað um 3,7% undanfarna 12 mánuði. Þetta gæti verið meðal þess sem útskýrir af hverju neytendur eru bjartsýnni nú en oft áður.