Evran veikist og dollar styrkist

Þó íslenska hagkerfið sé um margt ágætlega varið fyrir væringum á alþjóðamörkuðum, m.a. vegna gjaldeyrishafta, þá hafa sveiflur á mörkuðum erlendis birst undanfarin misseri í því hvert gengi krónunnar er gagnvart helstu erlendu gjaldmiðlum. Á sama tíma og krónan hefur styrkst lítillega gagnvart evru þá hefur krónan veikst skarplega gagnvart dollar.

Fyrir hverja evru er nú hægt að fá 159 krónur, samkvæmt opinberu gengi. Fyrir hvern dollar er nú hægt að fá tæplega 124 krónur, en fyrir um tveimur mánuðum var hægt að fá 114 krónur fyrir hvern dollar. Fyrir hvert breskt pund er nú hægt að fæ tæplega 193 krónur.

Með þessum hætti birtist þróun á alþjóðamörkuðum hér á landi, en staða evru gagnvart dollar er nú veik í sögulegu samhengi. Þar ráða áhyggjur fjárfesta af því að ekki séu enn öll kurl komin til grafar þegar kemur að stöðu mála í Evrópu, samkvæmt umsögnum erlendra fjölmiðla. Á vef Wall Street Journal segir m.a. í dag að búist sé við því að evran geti veikst enn frekar gagnvart dollar á næstu misserum. Óvissan er þó enn mikil og vandi um það að spá, hvernig staða mála verður í framtíðinni.