Walker kaupir brugghús Ölgerðarinnar

Malcolm Walker, stofnandi og forstjóri Iceland matvælakeðjunnar, er aðalfjárfestirinn að baki kaupum á Catco vín ehf, félags sem var í eigu Ölgerðarinnar og rekur brugghús í Borgarnesi. Þetta kemur fram í DV í dag en Catco sér meðal annars um framleiðslu á Reyka-vodka.

Í blaðinu segir að kaupverðið fáist ekki gefið upp. Magnús Arnar Arngrímsson, nýr framkvæmdastjóri félagsins, segir við DV að stefnan sé sett á aukinn útflutning sterkra vína úr íslensku vatni, „sérstaklega Martin Miller gini, sem hafi fallið í góðan jarðveg í Bretlandi."

„DV fékk ábendingu um að Lárus Welding, fyrrverandi forstjóri Glitnis, hafi komið að kaupunum en Magnús segir að hann hafi ekki lagt til fjármagn. Hann hafi hins vegar veitt Malcolm ráðgjöf við kaupin. Fram hefur komið að Magnús er einn besti vinur Lárusar Welding og komu þeir til starfa hjá Glitni á sama tíma. Magnús gegndi stöðu framkvæmdastjóra fjárfestingabankasviðs Glitnis og starfaði hjá Íslandsbanka eftir hrun," segir í frétt DV.