Hagfræðistofnun segir kostnað við tillögur HH um 200 milljarða

Hagfræðistofnun Háskóla Íslands segir að kostnaðurinn við þá leið sem Hagsmunasamtök heimilanna hafa lagt til, þ.e. „18,7% niðurfærslu allra íbúðalána til viðbótar við það sem þegar hefur verið gert", sé um 200 milljarðar króna.

Þetta kemur fram í skýrslu sem Hagfræðistofnun Háskóla Íslands vann fyrir forsætisráðuneytið, eftir að ráðuneytið fékk afhendar undirskriftir 33.525 einstaklingar sem kröfðust afnáms verðtryggingar húsnæðislána og almennra og réttlátra leiðréttinga á húsnæðislánum.

Í skýrslunni kemur fram að það sé mat Hagfræðistofnunar að munurinn á kröfuvirði lánasafna bankanna, og því verði sem bankarnir greiddu fyrir lánasöfnin, sé um 95 milljarðar króna á verðlagi í október 2008.

„Munurinn skýrist annars vegar með mun á nafnverði og líklegum endurheimtum og hins vegar af markaðsvöxtum á þeim tíma þegar bankarnir eignuðust lánasöfnin. Ef t.d. er gert ráð fyrir að afföll vegna vaxtamunar hafi verið 20 til 40 prósent af heildarniðurfærslum má áætla að niðurfærslur vegna tapáhættu hafi samtals numið 55 til 75 milljörðum króna. Taka verður fram að matið byggir á mörgum óvissum stærðum. Ekki er t.d. ljós hvaða gengi ber að reikna á gengisbundnum lánum eða hvaða vöxtum ber að reikna með," segir í skýrslunni.