Vísbendingar um mun kröftugri hagvöxt í ár

Allt bendir nú til þess að hagvöxtur á þessu ári verði mun kröftugri en spár Seðlabanka, Hagstofunnar og fleiri aðila hafa gefið til kynna.

Þetta kemur fram í grein sem Ásgeir Jónsson lektor við Háskóla Íslands og efnahagsráðgjafi GAMMA hefur skrifað í tímaritið Vísbendingu. Ásgeir segir að eiginlega allar vísbendingar séu samhljóða um aukinn hagvöxt sem verði að mestu leiddur áfram með vexti einkaneyslu en einnig fjárfestingu í einhverjum mæli.

Hinsvegar sé íslenska hagkerfið í skrúfstykki í þeim skilningi að innflutningur getur ekki aukist verulega umfram útflutning án þess að hætta steðji að gjaldeyrisstöðu landsins og gengi krónunnar. Þjóðin getur ekki lengur eytt meira en hún aflar og fjármagnað innlenda neyslu og viðskiptahalla með erlendu lánsfé sem raunin hefur verið svo oft áður.

Þessi vaxtarkippur sem nú er í burðarliðnum getur því ekki orðið langvinnur fyrir tilverknað innlendrar eftirspurnar einnar saman og dregur vart lengra en fram á árið 2013 nema að fleira komi til.