Samþykkt að selja Landsbankanum Sparisjóð Svarfdæla

Á stofnfjárhafafundi Sparisjóðs Svarfdæla sem haldinn var í gær var samþykkt að rekstur Sparisjóðs Svarfdæla yrði seldur Landsbankanum hf.

Í tilkynningu segir að fulltrúar rúmlega 99% hlutafjár samþykktu tilboð Landsbankans í rekstur og eignir sparisjóðsins. Það var samþykkt af stjórn sjóðsins skömmu fyrir síðastliðin áramót með fyrirvara um endanlegt samþykki á stofnfjárhafafundi.

Samkvæmt tilboðinu yfirtekur Landsbankinn skuldbindingar vegna innlána og víkjandi lána, sem samtals nema um 3,2 milljörðum króna og greiðir að auki 165 milljónir kr. Enn fremur yfirtekur Landsbankinn allar rekstrarlegar skuldbindingar sparisjóðsins.

Endanleg sala er enn háð samþykki Fjármálaeftirlitsins, Samkeppniseftirlitsins og Eftirlitsstofnunar EFTA en að fengnu samþykki þessara aðila, mun Landsbankinn yfirtaka rekstur Sparisjóðs Svarfdæla.