Verjandi Baldurs: Það ber að vísa málinu frá

Karl Axelsson hrl., verjandi Baldurs Guðlaugssonar, sagði í málflutningi í Hæstarétti í dag að það bæri að vísa máli ákæruvaldsins á hendur Baldri frá dómi. Karl sagði engin ný rannsóknargögn hefðu komið fram þegar ákveðið var að hefja rannsókn að nýju eftir að Fjármálaeftirlitið felldi málið niður. Því væri um að ræða endurtekna málsmeðferð sem væri í andstöðu við ákvæði mannréttindasáttamála Evrópu.

Varakrafa Karls í málinu var sú að Baldur yrði sýknaður. Baldur fór yfir rannsókn málsins í málflutningi og gagnrýndi hana. Þá sagði hann að héraðsdómur hefði átt að vera fjölskipaður í málinu, en Guðjón Marteinsson dæmdi einn í málinu.

Sigríður Friðjónsdóttir ríkissaksóknari sagði í málflutningi í morgun, í máli ákæruvaldsins gegn Baldri Guðlaugssyni, fyrrverandi ráðuneytisstjóra í fjármálaráðuneytinu, að brot Baldurs geti varðað allt að níu ára fangelsi.

Hámarksrefsing fyrir innherjasvik samkvæmt lögum er sex ára fangelsi, en til viðbótar kemur síðan ef brot er framið í opinberu starfi, að því er Sigríður greindi frá í málflutningi sínum.

Baldur var hinn 7. apríl í fyrra dæmdur í tveggja ára óskilorðsbundið fangelsi í héraði fyrir innherjasvik og brot í opinberu starfi, er hann seldi hlutabréf sín í Landsbankanum fyrir ríflega 190 milljónir króna, í september 2008. Baldur var þá formaður samráðshóps stjórnvalda um fjármálastöðguleika, og hafði innherjaupplýsingar undir höndum að því er héraðsdómari taldi. Landsbankinn var tekinn yfir af Fjármálaeftirlitinu hinn 7. október.

Baldur hefur staðfastlega neitað sök í málinu og sagði í vitnaleiðslum í héraði að hann hefði ekki haft neinar upplýsingar undir höndum sem gáfu tilefni til þess að ætla að hlutafé Landsbankans yrði verðlaust skömmu eftir að hann seldi bréf sín.