Kyrrsetning á eignum handboltastjörnu aflétt - rannsókn of hæg

Hæstiréttur Íslands hefur fellt úr gildi kyrrsetningakröfu sérstaks saksóknara gegn fjórum mönnum sem eru grunaðir um brot gegn neyðarlögunum.

Mennirnir sem um ræðir voru handteknir í viðamiklum aðgerðum sérstaks saksóknara í janúar 2010. Mennirnir sem um ræðir heita Karl Löve Jóhannsson, Gísli Reynisson, Ólafur Sigmundsson og Markús Máni Michaelsson, sem varð landsfrægur þegar hann spilaði handbolta á árum áður.

Rannsóknin nær yfir tímabilið nóvember 2008 til október 2009, en mennirnir ráku þá félagið Aserta. Velta þess var um 48 milljarðar króna.

Mennirnir eru grunaðir um að hafa brotið gegn lögum um gjaldeyri. Urðu viðskipti þeirra til þess að allt að þrettán milljarðar króna í formi gjaldeyris glötuðust af gjaldeyrismarkaðnum hér á landi, á tímum þegar þjóðarbúið var í mikilli þörf fyrir gjaldeyri, að því er greint var frá þegar mennirnir voru handteknir.

Upphæðin jafngildir tveggja mánaða afgangi af vöruskiptum Íslands við útlönd á þeim tíma sem svikin áttu að hafa átt sér stað.

Farið var fram á að eignir mannanna, meðal annars innistæður í Svíþjóð, yrðu kyrrsettar. Samanlagt nam upphæðin um 143 milljónum króna sem voru kyrrsettar. Krafan nemur um 400 milljónum króna.

Hæstiréttur felldi bannið hinsvegar úr gildi þar sem dómarar telja rannsókn málsins hafa dregist fram úr öllu hófi.

Í viðtali við RÚV segir Ólafur Þór Hauksson, sérstakur saksóknari, „Við höfum bætt við mannafla í þessa rannsókn og hún stendur enn þá."

Hann sagði talsverða vinnu eftir, en ekki væri hægt að segja til um hvenær rannsókninni ljúki. Málið fékk deildin í arf frá efnahagsbrotadeildinni, sem sameinaðist embætti sérstaks saksóknara fyrir skömmu.