OR eflir áhættuvarnir sínar

Stjórn Orkuveitu Reykjavíkur (OR) hefur samþykkt áhættustefnu fyrir rekstur fyrirtækisins. Jafnframt hefur verið komið á fót endurskoðunarnefnd stjórnar og samið um fjárhagslegar áhættuvarnir gagnvart sveiflum á álverði og vöxtum á erlendum lánum.

Í tilkynningu segir að þetta sé í fyrsta sinn að stjórnin samþykkir heildstæða áhættustefnu fyrir reksturinn. Öllum rekstri fylgir áhætta og það er stefna stjórnar Orkuveitunnar að í allri starfsemi fyrirtækisins sé gætt að áhættu og með því stuðlað að ábyrgum og skilvirkum ákvörðunum og stjórnunarháttum.

Stjórn Orkuveitunnar hefur einnig sett á fót endurskoðunarnefnd. Hlutverk hennar er meðal annars að hafa eftirlit með vinnulagi við reikningsskil og endurskoðun uppgjörs, eftirlit með innri endurskoðun Orkuveitunnar, áhættustýringu jafnframt því að meta hæfi ytri endurskoðenda fyrirtækisins.

Leitað var samninga við fjármálafyrirtæki um áhættuvarnir. Samningar tókust við hollenska bankann ING og lítur Orkuveitan svo á að með samningnum sé lýst trausti á þá aðgerðaáætlun sem Orkuveitan starfar nú eftir. Óhagstæð þróun álverðs og gengis hefur nú minni áhrif á lausafjárþörf Orkuveitunnar en áður og styrkir stoðir aðgerðaáætlunarinnar.

„Þessi skref sem stjórn hefur nú stigið miða öll í þá átt að auka stöðugleika og festu í rekstri Orkuveitunnar. Það er fyrirtækinu og orðspori þess líka afar mikilvægt að virt erlent fjármálafyrirtæki sýni stjórnun fyrirtækisins það traust að gera áhættuvarnasamning. Þar geta talsverðir fjármunir verið í húfi," segir Haraldur Flosi Tryggvason, formaður stjórnar OR.