Byggðamál að heimila sölu á áfengi í matvöruverslunum

Ef sala á áfengi yrði heimiluð í matvöruverslunum myndi það styrkja rekstur slíkra verslana á fámennum stöðum. Þetta segir Finnur Árnason, forstjóri Haga sem á og rekur verslanir á borð við Hagkaup og Bónus.

„Það er náttúrlega oft á brattan að sækja með verslunarrekstur úti á landsbyggðinni og alveg ljóst að því fleiri stoðir sem verslunin hefur því sterkari getur hún verið og það er erfiðara að halda úti dagvöruverslun á fámennum stöðum," segir Finnur. Hann segir að áfengissala í verslunum myndi kannski styrkja og ýta undir rekstrargrundvöll á slíkum stöðum.

Finnur sagði í samtali við Reykjavík síðdegis í dag að salan yrði að vera samkvæmt öllum þeim skilyrðum sem nauðsynlegar eru til að tryggja rétta umgengni við þessa vöru. Hann bendir á að áfengi sé selt í verslunum víðast í kringum okkur. „Við förum til Bandaríkjanna eða Bretlands, eða þess vegna Danmerkur og þar er léttvín og bjór fáanlegt," segir Finnur.

Finnur segir að það sé gríðarlegt óhagræði í því að selja vöruna í sérstökum verslunum. „Ríkissjóður getur fengið allar þær tekjur sem hann vill með því að stýra gjaldtöku. Hann getur losnað við kostnaðinn við rekstur búðanna. Hann er að selja tóbak og nær þar tekjum sem hann vill en hann sér ekki um rekstur tóbaksbúða og ég sé engan mun á þessum vörum," segir Finnur.