Jón Ólafsson átti að greiða skatt á Íslandi

Héraðsdómur Reykjavíkur hefur staðfest úrskurð ríkisskattstjóra frá desember 2003 um að Jón Ólafsson athafnamaður hafi haft skattalega heimilisfesti og beri fulla og ótakmarkaða skattskyldu hér á landi í skilningi laga um tekjuskatt allt frá árinu 1998. Jón Ólafsson stefndi íslenska ríkinu fyrir héraðsdómi eftir úrskurð ríkisskattstjóra og birti Héraðsdómur Reykjavíkur úrskurð sinn í dag.

Héraðsdómur kemst að þeirri niðurstöðu að Jón Ólafsson hafi talið fram til skatts hér á landi á árunum 1998-2001. Einnig sé óumdeilt að Jón hafi notfært sér niðurgreidda heilbrigðisþjónustu hér á landi á árunum 1998-2001. Héraðsdómur telur því að Jón hafi talið sig heimilisfastan hér á landi frá þessum tíma.

Dómurinn segir jafnframt að gögn frá skattyfirvöldum í Bretlandi sýni ekki að Jón hafi verið talinn heimilisfastur aðili í Bretlandi á árunum 1998-2001 í skilningi tvísköttunarsamnings sem Ísland og Bretland hafa gert með sér. Ekki sé sýnt fram á að hann hafi talið fram til skatts sem slíkur þar í landi á þessum árum.