Hæstiréttur vísar máli Hauks aftur í hérað

Hæstiréttur Íslands ómerkti í dag dóm Héraðsdóms Reykjavíkur yfir Hauki Þór Haraldssyni, fyrrverandi framkvæmdastjóra hjá Landsbankanum. Er málinu vísað til héraðsdóms til löglegrar meðferðar. Haukur var ákærður fyrir fjárdrátt á 118 milljónum króna. Hann er sakaður um að hafa látið millifæra af innlendum gjaldeyrisreikningi í eigu félags á vegum Landsbankans, sem hann var stjórnarmaður í og hafði prókúru fyrir, yfir á eigin bankareikning.

Það er óhætt að segja að mál Hauks hafi velkst um í dómskerfinu, en þetta er í annað sinn sem Hæstiréttur vísar máli Hauks aftur í hérað. Í fyrstu var hann sýknaður af öllum sökum í Héraðsdómi Reykjavíkur. Hæstiréttur hnekkti þeim dómi og sendi hann aftur í hérað. Svo var hann dæmdur í tveggja ára fangelsi. Sá dómur hefur nú verið ómerktur og því ljóst að það þarf að rétta enn á ný yfir Hauki.

Ástæða þess að málinu er vísað í hérað nú er sú að þegar Hæstiréttur komst að þeirri niðurstöðu að málinu skyldi vísað aftur í hérað í fyrra skipti hafi verið fyrir hendi ákveðin gögn sem héraðsdómur hafi ekki tekið nægjanlegt tillit til við fyrir úrlausn málsins fyrir héraðsdómi. Vegna þessa var litið svo á að ætla yrði að niðurstaða í dóminum um sönnunarmat kynni að vera röng að einhverju leyti. Þegar héraðsdómur tók svo málið til meðferðar í annað skipti átti dómurinn að vera fjölskipaður, samkvæmt lögum um meðferð sakamála. Það var hann ekki. Því vísaði Hæstiréttur málinu í hérað í annað sinn.