Gift til rannsóknar hjá Sérstökum saksóknara

Embætti sérstaks saksóknara rannsakar nú hvort Gift fjárfestingafélag hafi fengið óeðlilega fyrirgreiðslu hjá Kaupþingi fyrir hrun, en félagið var meðal stærstu hluthafa bankans. Rannsókn starfsmanna endurskoðunarfyrirtækisins PWC er meðal þeirra gagna sem liggja til grundvallar í málinu.

Fjárfestingafélagið Gift, sem stofnað var um skuldbindingar Samvinnutrygginga um mitt ár 2007, er nú til rannsóknar hjá embætti sérstaks saksóknara, og þá einkum hlutabréfaviðskipti félagsins síðasta árið fyrir hrun bankans.

Í skýrslu sem starfsmenn endurskoðunarfyrirtækisins PWC unnu fyrir slitastjórn Kaupþings var farið rækilega yfir ýmsa þætti í starfsemi félagins, en þau gögn sem slitastjórn lét taka saman eru komin í hendur sérstaks saksóknara.

Þar á meðal eru viðskiptagjörningar síðasta árið fyrir hrun Kaupþings, en hagsmunir Giftar voru samtvinnaðir bankanum með ýmsum hætti. Þannig var Gift meðal stærstu hluthafa Kaupþings við fall hans með 3,4 prósent hlut og meðal stærstu eigenda Exista, sem átti fjórðungs hlut í Kaupþingi, sem jafnframt var stærsti viðskiptabanki Giftar.

Þegar best lét, á árinu 2007, var félagið með bókfært eigið fé upp ár rúmlega 30 milljarða króna, skuldir upp á um 30 milljarða og eignir upp á ríflega 60 milljarða.

Í skýrslu PWC er meðal annars fjallað um fyrirgreiðslu sem Gift fékk á árinu 2008, þegar Glitnir, Landsbankinn og SPRON gjaldfelldu lán Giftar. Þá kom Kaupþing félaginu ítrekað til bjargar, með viðbótarlánum, þrátt fyrir að félagið hafi verið illa statt fjárhagslega, og með neikvæða eiginfjárfstöðu.

Síðasta fyrirgreiðslan af þessu tagi átti sér stað í september 2008. Í skýrslu PWC er meðal annars farið ítarlega í gegnum tölvupósta yfirmanna í Kaupþingi, þeirra Bjarka Diego, fyrrum framkvæmdastjóra útlána, Ingólfs Helgasonar, fyrrum forstjóra Kaupþings á Íslandi, og Hreiðars Más Sigurðasonar, fyrrum forstjóra Kaupþings. Var það gert til þess að reyna að varpa ljósi á aðgerðir sem gripið var til frá haustmánuðum 2007 og fram að hruni bankans í október 2008.

Gift fór illa út úr hruninu, en skuldir félagsins ruku upp við gengisfallið á meðan næstum allar eignir félagsins urðu að engu. Þannig var eigið fé félagsins neikvætt um nærri sextíu milljarða eftir hrunið. Eigendur félagsins, sem í reynd eru fyrrum tryggingartakar hjá Samvinnutryggingum, töpuðu þar með öllu sínu.