Vildi að metið yrði hvort Kaupþing hefði tapað á afléttingu ábyrgða

Hæstiréttur hefur hafnað kröfu Sigurðar Einarssonar, fyrrverandi stjórnarformanns Kaupþings, um að óháðir matsmenn kanni hvert virði eignarhluta hans í Kaupþingi banka var í lok september 2008.

Sigurður krafðist þess einnig að metið yrði hvort hann hefði hagnast af þeirri ákvörðun þáverandi stjórnar Kaupþings þann 25. september 2008 að aflétta persónulegri greiðsluábyrgð Sigurðar á lánssamningum og ef svo sé hver sú auðgun hafi verið. Einnig hvort Kaupþing hafi orðið fyrir tjóni vegna þessarar ákvörðunar og hvert tjónið hafi þá verið. Slitastjórn Kaupþings krefst tæplega 550 milljóna króna frá Sigurði og að samningi vegna afléttingu persónulegra ábyrgða á lánum sem hann fékk til hlutabréfakaupa í bankanum verði aflétt.

Héraðsdómari hafði hafnað því að kveða til matsmenn á þeirri forsendu að Sigurður hafi ekki krafist matsmannanna strax eftir að Kaupþing höfðaði mál gegn honum vegna afléttingu ábyrgðanna. Slíka kröfu skuli bera fram svo fljótt sem auðið er. Hæstiréttur staðfestir synjun héraðsdóms en á öðrum forsendum. Telur Hæstiréttur að þau atriði sem Sigurður vilji að matsmenn leggi mat á séu ekki af öðrum toga en lögfræðilegum. Það sé hlutverk dómara, en ekki sérfróðra matsmanna, að leggja mat á þessi atriði.