Skýrslutökur hafnar hjá rannsóknarnefnd Íbúðalánasjóðs

Vinna rannsóknarnefndar sparisjóðanna og rannsóknarnefndar Íbúðalánasjóðs er komin á fullan skrið og eru skýrslutökur hafnar hjá rannsóknarnefnd Íbúðalánasjóðs.

Hinn 6. september var skipuð rannsóknarnefnd Alþingis vegna rannsóknar á Íbúðalánasjóði. Í henni eiga sæti Sigurður Hallur Stefánsson, fyrrverandi héraðsdómari, formaður nefndarinnar, Kirstín Flygenring hagfræðingur og Jón Þorvaldur Heiðarsson, lektor við viðskiptafræðideild Háskólans á Akureyri.

Um er að ræða hliðstæða nefnd og skipuð var vegna rannsókna á falli sparisjóðanna en í henni sitja þau Sigríður Ingvarsdóttir, héraðsdómari, sem er formaður nefndarinnar, Tinna Finnbogadóttir hagfræðingur og Bjarni Frímann Karlsson, lektor í viðskiptafræði.

Verkefni þeirra er að komast að hinu sanna í rekstri Spron, Byrs, Sparisjóðsins í Keflavík og fleiri sparisjóða. Í raun verður rekstur sparisjóðanna afhjúpaður með sama hætti og gert var í skýrslu rannsóknarnefndar Alþingis vegna falls viðskiptabankanna.

Báðar rannsóknarnefndirnar eru með vinnuaðstöðu við Austurströnd 5 á Seltjarnarnesi, sem áður hýsti skrifstofur landlæknis. Starf þarf nefndanna er nú komið á fullan skrið og samkvæmt upplýsingum fréttastofu eru formlegar skýrslutökur nú hafnar hjá rannsóknarnefnd Íbúðalánasjóðs. Hjá rannsóknarnefnd sparisjóðanna fengust þau svör að formlegar skýrslutökur væru ekki hafnar, en nefndin hefði tekið óformleg viðtöl við nokkurn fjölda.

Sniðið verður með svipuðum hætti og hjá rannsóknarnefnd Alþingis vegna falls viðskiptabankanna. Skýrslutökur verða hljóðritaðar og mun efni þeirra síðan nýtast í skýrslu sem leiða á í ljós fjárhagsvanda Íbúðalánasjóðs, en sjóðurinn þurfti í lok árs 2010 33 milljarða króna lausafjáraðstoð frá ríkinu en án þessarar aðstoðar hefði sjóðurinn ekki verið starfhæfur í óbreyttri mynd. Skýrsla rannsóknarnefndar sparisjóðanna verður eftir svipaðri fyrirmynd. thorbjorn@stod2.is