Tekist á um vexti á tugmilljarða skuld

Arion banki hefur stefnt Dróma og Fjármálaeftirlitinu (FME) fyrir dómstóla vegna vaxtakjara á um 80 milljarða króna skuldabréfi sem gefið var út vegna yfirtöku Arion á innlánum Spron. Drómi, sem heldur á útlánum hins fallna sparisjóðs, hefur á móti stefnt bankanum og FME vegna sama máls. Munnlegur málflutningur í fyrra málinu fór fram í fyrradag og fer fram í hinu seinna á morgun, föstudag. Um gríðarlegar fjárhæðir er um að ræða, enda er hvert prósent í vöxtum um 800 milljóna króna virði.

Þann 21. mars 2009 ákvað FME að færa innlán SPRON yfir til Arion en útlán bankans urðu eftir í félagi sem í dag heitir Drómi. Til að mæta innlánunum, sem eru skuld á efnahagsreikningi Arion, var gefið út skuldabréf sem fært er á eignarhlið Arion. Virði þess er tæplega 10% af heildareignum bankans.

Í ársreikningi Dróma fyrir árið 2010 er umrædd skuld bókfærð á 77,4 milljarða króna. Hún er ekki sérstaklega tilgreind í ársreikningi Arion heldur felld undir lið sem kallast „óskráð skuldabréf“. Virði þeirra samkvæmt ársreikningnum er um 85 milljarðar króna og því ljóst að Dróma-skuldabréfið er uppistaðan í þessum lið reikningsins.

Í þeim skilmálum sem settir voru þegar skuldabréfið var gefið út var FME gefið einhliða vald til að ákvarða hverjir vextir þess eru. Samkvæmt ákvörðun eftirlitsins átti skuldabréfið að bera fasta árlega Reibor-vexti (vexti á millibankamarkaði með krónur) auk 175 punkta vaxtaálags þar til að skuldin væri að fullu greidd. Drómi fór fram á það í desember 2009 að FME endurskoðaði fyrri ákvörðun um þá vexti sem skuldabréfið átti að bera. Í febrúar 2011 ákvað eftirlitið að afnema vaxtaálagið þar til bréfið er að fullu greitt. Við þetta sætti Arion banki sig ekki og stefndi bæði FME og Dróma til að reyna að fá ákvörðuninni frá því í febrúar í fyrra hnekkt. Drómi hefur auk þess stefnt Arion og FME og vill fá öllum vaxtaákvörðunum á skuldabréfinu hnekkt. Til vara krefst félagið að lægri vextir séu á bréfinu frá útgáfu þess.

thordur@frettabladid.is