Krónan fellur mest gagnvart dollar af öllum gjaldmiðlum heimsins

Íslenska krónan hefur fallið mest gagnvart bandaríkjadollar af öllum gjaldmiðlum heimsins það sem af er þessu ári. Það er gjaldmiðla bæði þróaðra og nýmarkaðsríkja.

Þetta kemur fram á Bloomberg fréttaveitunni. Þar segir að íslenska krónan hafi fallið um 3,4% gagnvart dollaranum. Næst á eftir krónunni kemur argentínski pesóinn en hann hefur fallið um 1,7% gagnvart dollaranum.

Þeir gjaldmiðlar sem hafa styrkst mest gagnvart dollaranum á þessu tímabili eru forintan í Ungverjalandi og zlotyið í Póllandi en báðir þessir gjaldmiðlar hafa styrkst um rúmlega 10% gagnvart dollaranum.

Evran hefur styrkst um 0,6% gagnvart dollaranum, nýsjálenski dollarinn um 3,2% og norska krónan um 2% á árinu.