Styttist í samninga um fjármögnun Vaðlaheiðarganga

Bæjarstjórinn á Akureyri, Eiríkur Björn Björgvinsson, vonast til þess að gengið verði endanlega frá samningum um fjármögnun Vaðlaheiðarganga á næstu dögum. Þetta sagði Eiríkur í samtali við Vikudag á Akureyri eftir fund hans með fjármálaráðherra og atvinnuvegaráðherra.

„Þetta var gagnlegur fundur," sagði Eiríkur, en á fundinum var rætt um gerð lánasamnings milli ríkissjóðs og Greiðar leiðar ehf vegna framkvæmda á Vaðlaheiðargöngum en Alþingi samþykkti í júní lög til að heimila framkvæmdina. Þrátt fyrir samþykktina hefur enn ekki verið gengið frá samningum.

Kristján Þór Júlíusson, þingmaður Sjálfstæðisflokksins furðar sig á seinaganginum. „Hartnær fjórir mánuðir eru liðnir frá því Alþingi samþykkti endanlega að ráðist skyldi í verkið og þrátt fyrir það hefur ekki tekist að semja við ríkið um lánsfjármögnunina," segir hann og telur vandræðaganginn með ólíkindum.