Eignir bankans sem vill kaupa Íslandsbanka metnar á 46 þúsund milljarða

Bankinn sem sýnt hefur áhuga á að kaupa Íslandsbanka er almennt álitinn einn stöndugasti banki Norðurlanda. Heildareignir hans eru metnar á liðlega 46 þúsund milljarða íslenskra króna.

Norski bankinn DNB bank, sem er einn þeirra sem sýnt hefur áhuga á því að kaupa Íslandsbanka, er almennt álitinn einn traustasti banki Norðurlandanna.

Slitastjórn Glitnis, sem fer með 95% hlutafjár, hefur sett það í hendur svissneska bankans UBS að hafa umsjón með söluferli á Íslandsbanka.

Heildareignir DNB eru metnar á 46 þúsund milljarða króna, sé mið tekið af stöðu bankans í lok september á síðasta ári. Til samanburðar má nefna að heildareignir Íslandsbanka eru metnar á 814 milljarða eftir sameiningu við Byr. Efnahagsreikningur DNB er því meira en 50 sinnum stærri en Íslandsbanka.

Stærsti einstaki hluthafi DNB er norska ríkið með 34 prósent hlut.

Meðal annarra stórra hluthafa eru eitt stærsta eignastýringarfyrirtæki heims, Blackrock Investments, Banki fólksins í Kína, Opinberir sjóðir ríkisins í Sádí Arabíu og síðan sjóðir í stýringu risabankanum JP Morgan.

Ekki er þó á vísan að róa í þessum efnum, eins og umhverfið er á alþjóðamörkuðum í augnablikinu. Það er frekar til þess að fallið að seinka sölu á bankanum en hitt, en kaup á fjármálastofnunum í heilu lagi eru ekki algeng um þessar mundir.

Nauðasamningsferli þrotabúa Glitnis og Kaupþings getur einnig haft áhrif á það hvernig þessum málum lýkur. Að hluta eru eigendur krafna í bú hinna föllnu banka þeir sömu, og ef tekst að ná nauðasamningum gæti sú staða verið uppi að sömu aðilarnir voru kjöfestuhluthafar í tveimur bönkum, sem ólíklegt verður að teljast að Samkeppniseftirlitið sætti sig við.

Annað er að íslenska ríkið á 5 prósent hlut í Íslandsbanka, og 13 prósent hlut í Arion banka og 80 prósent hlut í Landsbankanum. Það ræður för hvaða þessa eignarhluti varðar.