Vilja rannsókn á samráði fjármálafyrirtækja

Hagsmunasamtök heimilanna fara fram á rannsókn Samkeppniseftirlitsins á aðkomu Samtaka fjármálafyrirtækja að samráði sem fjármálafyrirtæki fengu að hafa um viðbrögð við hæstaréttardómi frá 15. febrúar í gengislánamáli.

Með dómnum var m.a. komist að þeirri niðurstöðu að fyrirvaralaus móttaka fjármálafyrirtækis á greiðslum skuldara gengistryggðs láns væri jafngild fullnaðarkvittun. Því þurftu skuldarar ekki að greiða mismuninn úr fortíðinni sem kom fram þegar lánið var endurreiknað vegna dóma Hæstaréttar heldur var fjármálafyrirtækið látið bera hallann.

Í kjölfarið fengu fjármálafyrirtæki undanþágu frá reglum samkeppniseftirlitsins til að hafa samráð um hvernig bregðast ætti við dómnum. Fyrir undanþágunni voru „afmarkandi skilyrði," og Samtök fjármálafyrirtækja áttu ekki að taka þátt „að öðru leyti en að þeim var heimilt að útvega fundarstöðu og ritara," segir í fréttatilkynningu frá Hagsmunasamtökum heimilanna sem þykjast nú hafa heimildir og rökstuddan grun fyrir að þátttaka Samtaka fjármálafyrirtækja í samstarfinu hafi orðið talsvert meiri en skilyrðin leyfðu.

„Er sá grunur m.a. studdur af ummælum sem fallið hafa í viðtölum fjölmiðla við forstjóra Fjármálaeftirlitsins, Umboðsmanns skuldara, auk upplýsinga sem fram koma í fréttatilkynningum frá embættinu og Samtökum Fjármálafyrirtækja," segir í fréttatilkynningu.

Því er farið fram á að Samkeppniseftirlitið rannsaki aðkomu Samtaka fjármálafyrirtækja að samstarfinu.