Gylfi: Þarf að leita annarra lausna við afnám hafta

Seðlabankinn vinnur eftir áætlun um afnám gjaldeyrishafta og er notast við svonefnda útboðsleið til þess að vinna á snjóhengju aflandskróna, í því skyni að minnka þrýsting á krónuna, svo mögulegt sé að afnema gjaldeyrishöftin. Seðlabankinn telur að nokkur árangur hafi náðst, en meðal þess sem horft er að til er að virkja aflandskrónurnar með fjárfestingu í íslensku atvinnulífi.

Gylfi Magnússson, dósent í hagfræði við viðskiptafræðideild Háskóla Íslands og fyrrverandi efnahags- og viðskiptaráðherra, segir að árangurinn af leið Seðlabanka Íslands hafi ekki verið nægilega góður, og vill að opnað verði á nýjar leiðir til þess að hraða afnámi hafta.

„Seðlabankinn hefur unnið eftir útboðsleiðinni, en hún hefur ekki gefist nægilega vel. Ég tel að það sé full ástæða til þess að leita að öðrum lausnum," segir Gylfi.

Gylfi segir þá leið ákjósanlega að gefa út langtímaskuldabréf í erlendri mynt, sem aflandskrónueigendur geti fjárfest í.

„Það er leið sem ég tel að muni reynast vel, bæði fyrir íslenska ríkið og fjárfesta."