Gengi krónunnar í algjöru lágmarki

Gengi krónunnar hefur verið að lækka umtalsvert seinustu misseri og allt útlit er fyrir að hún verði lægri þegar markaðir loka í dag, en hún hefur verið á árinu. Jafnframt hefur mikil sveifla verið á genginu í ár og er t.d. um 14% munur á hæsta og lægsta gengi evru á móti krónu árið 2012.

Agnar Tómas Möller, sérfræðingur hjá GAMMA, segir í samtali við Vísi að út frá vöruskiptajöfnuði geti mánuðirnir frá nóvember og fram í febrúar verið erfiðir fyrir krónuna. Það sé alla jafna mikill innflutningur í kringum jólin og tekjur af ferðaþjónustu í lágmarki. Sem dæmi um það veiktist krónan umtalsvert bæði í ársbyrjun 2010 og 2011 en styrkist í kringum sumarmánuðina þegar ferðaþjónustan er í hámarki.

„Innflutningur hefur verið hægt og bítandi að aukast á sama tíma og lítið hefur verið fjárfest í útflutningsatvinnuvegunum s.l. ár. Horfurnar í sjávarútveginum eru óvissar, bæði út frá afla og afurðaverði sem og vegna stjórnmála, og útlit fyrir að tekjur muni frekar minnka en aukast í þeirri atvinnugrein. Það er því ekki ólíklegt að krónan muni áfram eiga undir högg að sækja á næstu misserum.