Sala á hlut banka gæti skilað 82 milljörðum

Verði frumvarp um sölu á eignarhlutum ríkisins í fjármálafyrirtækjum að lögum fær Oddný G. Harðardóttir, fjármála- og efnahagsráðherra, heimild til að selja 13 prósenta hlut í Arion banka, fimm prósenta hlut í Íslandsbanka, allt að 28 prósenta hlut í Landsbankanum og allt hlutafé sem ríkið á í sparisjóðum landsins. Í frumvarpinu, sem var lagt fram í gær, kemur fram á að leggja skuli áherslu á „opið söluferli, gagnsæi, hlutlægni og hagkvæmni" við söluna sem Bankasýsla ríkisins á að annast. Með hagkvæmni er átt við að leitað verði hæsta verðs eða markaðsverðs fyrir eignarhlutina.

Í fjárlagafrumvarpi næsta árs er gert ráð fyrir að sala eigna muni skila 8,6 milljörðum króna. Ljóst er að frumvarpið gerir því ekki ráð fyrir sölu á eignarhlutum ríkisins í stóru viðskiptabönkunum þremur.

Hlutur ríkisins í Landsbankanum er sem stendur 81,33 prósent. Í frumvarpinu kemur fram ríkið ætli sér að halda eftir 70 prósenta hlut í bankanum en selja hitt. Vegna hækkunar á virði skilyrts skuldabréfs er þó ljóst að ríkið hefur þegar tryggt sér auka fjórtán prósenta hlut í bankanum. Hækki virði skuldabréfsins meira á seinni hluta þessa árs mun 2,67 prósenta hlutur til viðbótar falla ríkinu í skaut. Innra virði eignarhlutar ríkisins í Landsbanka er því 202 til 208 milljarðar króna miðað við eiginfjárstöðu Landsbankans um mitt þetta ár. Virði þess hlutar sem ríkið ætlar að selja er því 53,7 til 59,4 milljarðar króna. Virði hlutarins í Arion er um sextán milljarðar króna og hlutur ríkisins í Íslandsbanka er sem stendur tæplega sjö milljarða króna virði. Þeir hlutir sem ríkið ætlar að selja í stóru viðskiptabönkunum þremur gætu því skilað á bilinu 76,7 til 82,4 milljörðum króna til ríkisins miðað við innra virði bankanna um mitt þetta ár. - þsj