Segja ekkert samráð hjá flugfélögunum tveimur

Upplýsingafulltrúar flugfélaganna Wow air og Iceland Express neita báðir að félögin hafi haft samráð þegar annað félagið ákvað að fljúga ekki til Danmerkur í vetur meðan hitt hættir að fljúga til Berlínar. Svanhvít Friðriksdóttir, upplýsingafulltrúi Wow air, segir að verðstríðið sem verið hefur að undanförnu milli félaganna sé skýrasta dæmið um að þar á bæ sé ekkert samráð í gangi.

Eins og fram kom í Viðskiptablaðinu í gær munu flugfélögin fækka áfangastöðum sínum í vetur. Bæði félögin tilkynntu nýlega um breyttar áætlanir og þá kom í ljós að þau draga sig í hlé sitt á hvorri vígstöðinni. Breytt áætlun mun í báðum tilvikum taka gildi í september.

Svanhvít segir að alltaf hafi legið fyrir að ekki yrði næg eftirspurn eftir flugi til að halda uppi ferðum til allra áfangastaða. Til að renna nokkurs konar stoðum undir þá fullyrðingu að ekki hafi verið haft samráð í fluginu bendir Svanhvít á verðstríð milli félaganna. „Það hefur verið hægt að fljúga að undanförnu fyrir svipaðan pening og tíðkaðist árið 2004," segir hún.