Lögmál að eftir niðursveiflu kemur uppgangur

„Eftir mikla niðursveiflu kemur uppgangur. Ég held að það sé svona nánast lögmál. Og það er það sem er að gerast," sagði Guðmundur Steingrímsson í útvarpsþættinum Á Sprengisandi um batnandi afkomu ríkissjóðs, en í Fréttablaðinu í gær var fjallað um auknar tekjur og minnkandi gjöld ríkissjóðs.

Hann gerir þó ekki lítið úr árangri ríkisstjórnarinnar og sérstaklega þakkar hann fyrir aðgerðir hennar í atvinnuleysismálunum, ekki síst ungs fólks. „Það var farið í það af mikilli festu að koma ungu fólki inn á vinnumarkaðinn," sagði Guðmundur. Þannig var komið í veg fyrir að heil kynslóð yrði iðjulaus en henni í staðinn komið í háskólanám, starfsnám eða út á vinnumarkaðinn.

Guðmundur segir hins vegar að ekki verði síður vandamál að glíma við uppganginn sem nú virðist fara í hönd. „Við þurfum að búa til stöðugra samfélag sem getur tekist á við góðæri. Það þarf að koma á stöðugleika," segir Guðmundur og talar um að erfitt verði að taka á verðbólgu og losa um gjaldeyrishöft.