Lífið er saltfiskur gildir aftur um efnahag Íslendinga

Verulega ólík þróun hefur verið á verði á helstu útflutningsafurðum Íslands það sem af er ári og eru sjávarafurðir aftur komnar á toppinn hvað verðmætið varðar.

Verðþróun á sjávarafurðum hefur verið hagstæð á árinu þó hægt hafi töluvert á verðhækkunum að undanförnu. Á sama tíma hefur verðþróun á áli verið afar óhagstæð. Álverðið hefur að jafnaði verið um 20% lægra á árinu miðað við sama tímabil í fyrra.

Þetta kemur fram í Morgunkorni greiningar Íslandsbanka. Þar segir að þessi neikvæða þróun á verði áls hafi dregið verulega úr útflutningsverðmæti þess. Verðmætið  var í krónum talið 30% minna í júlí sl. samanborið við júlí í fyrra.  Frá áramótum talið hefur verðmætið dregist saman um rúm 12% frá sama tímabili í fyrra.

Á hinn bóginn hefur útflutningur sjávarafurða verið yfir fimmtungi meiri á fyrstu sjö mánuðum ársins en á sama tímabili í fyrra. Þessi þróun hefur orðið til þess að sjávarútvegur vegur á ný talsvert þyngra en ál í útflutningstekjum. Í fyrra var vægi þessara tveggja vöruflokka í útflutningi hinsvegar álíka mikið.