Fasteignamarkaðurinn stóð nær í stað milli ára í ágúst

Veltan á fasteignamarkaðinum á höfuðborgarsvæðinu og fjöldi þinglýstra kaupsamninga stóð nær í stað í ágúst s.l. miðað við sama tímabil í fyrra. Veltan jókst um 0,6% og fjöldi samninga um 1,6% milli ára.

Þetta kemur fram á vefsíðu Þjóðskrár Íslands. Þar segir að fjöldi þinglýstra kaupsamninga um fasteignir við sýslumannsembættin á höfuðborgarsvæðinu í ágúst s.l. var 435. Heildarvelta nam 12,6 milljörðum króna og meðalupphæð á hvern kaupsamning var 28,9 milljónir króna.

Viðskipti með eignir í fjölbýli námu 8,8 milljörðum, viðskipti með eignir í sérbýli 2,7 milljörðum og viðskipti með aðrar eignir 1 milljarði króna.

Þegar ágúst s.l. er borinn saman við ágúst í fyrra fjölgar kaupsamningum um 1,6% og velta eykst um 0,6%. Í ágúst í fyrra var þinglýst 428 kaupsamningum, velta nam 12,5 milljörðum króna og meðalupphæð á hvern kaupsamning 29,2 milljónir króna.

Makaskiptasamningar voru 19 í ágúst s.l. eða 4,7% af öllum samningum. Í ágúst í fyrra voru makaskiptasamningar 29 eða 7,1% af öllum samningum. Makaskiptasamningur er þegar hluti kaupverðs er greiddur með annarri fasteign. Upplýsingar um makaskiptasamninga eiga eingöngu við um íbúðarhúsnæði.