Raungengi krónunnar ekki hærra frá hruni

Raungengi íslensku krónunnar hækkaði um 3,3% í ágúst frá fyrri mánuði á mælikvarða hlutfallslegs verðlags. Þetta er fimmti mánuðurinn í röð sem raungengi krónunnar þróast í þessa átt og stendur það nú í 80,2 stigum, sem er hæsta gildi þess frá því í september árið 2008.

Greining Íslandsbanka segir að þessa miklu hækkun á raungenginu nú megi að öllu leyti rekja til hækkunar á nafngengi krónunnar um 3,7% á milli júlí og ágúst miðað við vísitölu meðalgengis. Ljóst er að verðbólgan var nokkuð minni hér á landi en í okkar helstu viðskiptalöndum í ágústmánuði, og hefur dregið aðeins niður áhrifin af nafngengishækkuninni á raungengið á þessu tímabili.

Miðað við vísitölu neysluverðs þá lækkaði verðlag hér á landi um tæp 0,2% í ágúst frá fyrri mánuði, sem Greining segir að sé óvanalegt þar sem útsölulok hafi jafnan töluverð áhrif á ágústmælingu vísitölunnar, og hafa gjarnan verið einn helsti drifkraftur hækkunar á vísitölunni í mánuðinum. Ljóst sé hins vegar að sú mikla gengishækkun sem hafði átt sér stað vikurnar fyrir mælingu Hagstofunnar hafi sett sitt mark á vísitöluna að þessu sinni.