Gefur Síldarvinnslunni og Magnúsi frest fram á föstudag

Vestmannaeyjabær gefur Síldarvinnslunni og Magnúsi Kristinsynni frest fram til hádegis á föstudag til þess að leggja fram forkaupsréttartilboð í Berg-Huginn, þar sem söluverð og aðrir skilmálar eru tilgreindir á tæmandi hátt. Að öðrum kosti muni bærinn höfða mál fyrir dómstólum.

Þann 30. ágúst síðastliðinn var tilkynnt í fjölmiðlum um sölu á Berg-Huginn ehf. í Vestmannaeyjum til Síldarvinnslunnar á Neskaupsstað, en fyrirtækið var áður í eigu Magnúsar. Um var að ræða sölu á öllum eignarhlutum í félaginu en það er eigandi tveggja fiskiskipa - Bergeyjar VE-544 og Vestmannaeyjar VE-444 - og 5000 þorskígildistonna.

Eins og fram kom í kvöldfréttum Stöðvar 2 á dögunum telur Elliði Vignisson, bæjarstjóri Vestmannaeyja, að bærinn eigi forkaupsrétt á eignunum.