Enginn kaupréttur fyrir lykilstjórnendur Haga

Stjórnarformaður Haga, Árni Hauksson, segir lykilstjórnendur Haga ekki fá kauprétt í hlutabréfum félagsins svo lengi sem hann er í stjórn. Þetta var ákveðið á ársfundi Haga í dag sem Viðskiptablaðið segir frá.

„Það var samþykkt starfskjarastefna af hluthöfunum og hluthafarnir samþykktu okkar tillögu um að samkvæmt starfskjarastefnunni er ekki heimilt að gera kaupréttarsamninga við starfsmenn. Þeir voru ekki með slíka samninga en í gömlu stefnunni, frá fyrri tíð, var ákvæði um að það væri heimilt að gera slíka samninga við þá," sagði Árni Hauksson þegar Vísir náði tali af honum fyrir stundu.

Árni segir að aðalfjárfestar í Högum séu ekki hrifnir af kaupréttarsamningum, en þeir vilji hins vegar greiða góðum starfsmönnum góð laun. „Við greiðum góð laun fyrir gott fólk en við munum ekki afhenda fólki hlutabréf í félaginu á einhverju afsláttarverði eða hlutabréf yfir höfuð," segir Árni.

Árni segir að fréttir Stöðvar 2 af kaupréttarsamningum stjórnenda Eimskips hafi ekki haft nein áhrif á þessa ákvörðun. „Við lýstum þessu yfir við okkar meðfjárfesta, sem eru til dæmis lífeyrissjóðirnir, strax í upphafi fyrir ári síðan þannig að það hefur alltaf komið fram hjá okkur að við vildum ekki gera slíka samninga," segir Árni við Vísi.

Fimm stjórnendur Haga fengu gefins 1,4% eignarhlut í Högum frá Eignarbjargi, dótturfélagi Arion banka, áður en fyrirtækið var skráð á markað. Þar á meðal voru Finnur Árnason, forstjóri Haga, og Guðmundur Marteinsson, framkvæmdastjóri Bónuss.